BRIGA fai um chamado a votar 19-J na candidatura de NÓS-UP
Junho de 2005
Web eleitoral de NÓS-Unidade Popular
Com a aproximaçom das eleiçons de 19 de Julho ao Parlamento da CAG galega, diversos partidos políticos, nomeadamente o PSOE e o BNG, tenhem criado apoiando-se nos meios de comunicaçom de massas umha falsa expectativa de mudança. Neste contexto, vende-se a queda do PP do Governo da Junta como o objectivo a atingir, esgrimindo a necessidade de exercer o manido "voto útil" para chimpar o fascista Fraga Iribarne do trono que leva ocupando desde há décadas. Difunde-se a errónea ideia de que o Governo do PSOE, ou coligaçons deste com o autonomismo, vam permitir a tam aguardada mudança.
Esta estratégia é umha armadilha para ingénu@s. A mudança no Governo da CAG só reflectiria a alternáncia política bipartidista que rege a democracia espanhola, que nom esconde mais do que diferenças superficiais de duas forças políticas que nom estám dispostas à disgregaçom desse mercado que é Espanha. O PSOE está a demonstrar com umha vaga repressiva que nom se viviu nem nos tempos de Aznar que as diferenças entre estes partidos só estám nos meios de comunicaçom, nas fotos de jornais e nos debates de salom, para criar umha falsa sensaçom de democracia, de existência de diferentes alternativas políticas que na realidade som umha só.
Enquanto o autonomismo trata de tirar talhada de todo isto, subindo ao carro do espanholismo de Tourinho e de ZP, enquanto tenta espantar com a sua verborreia vácua os fantasmas que lhe tiram o sono: Os da claudicaçom, da institucionalizaçom e a assimilaçom polo projecto político espanhol que diziam combater.
Experiências como a de Compostela, umha cidade onde a esquerda independentista é sistematicamente perseguida e criminalizada, onde os julgamentos políticos estám a ordem do dia, falam com clareza de que é o que podemos aguardar dumha coligaçom "progressista" como a do PSOE e o BNG. As condiçons de exploraçom da juventude, de precariedade, de discriminaçom das jovens, de sinistraliedade nom mudárom nada com estes governos autoproclamados de "esquerda".
É por isso que, neste 19 de Julho, há umha única opçom conseqüente, umha única alternativa verdadeira, comprometida com a libertaçom da juventude trabalhadora galega, que assinala os verdadeiros problemas que está a sofrer a Galiza e as suas classes trabalhadoras, e que tem demonstrado a sua solidez como referente para a esquerda independentista e tod@s @s jovens conscientes do actual estado de retrocesso das liberdades e conquistas d@s operári@s. Por todo isto, BRIGA fai um chamado a toda a juventude de esquerdas para votar em NÓS-Unidade Popular como a única opçom possível, como o único voto verdadeiramente útil.