BRIGA participou nas III Jornadas internacionalistas organizadas por PURNA
Dezembro 2012Passado sábado 8 de dezembro decorrêrom em Saragoça (Aragom) as III Chornadas Internacionalistas realizadas pola juventude independentista e revolucionária aragonesa organizada em Purna. Como bem anunciárom, nesta ediçom queriam contar com organizaçons juvenis independentistas de duas naçons que ficam longe do seu território nacional. Deste jeito, a nossa organizaçom por Galiza e Azarug por Canárias fôrom as escolhidas.
Fruto do trabalho internacionalista considerado como fator fundamental para a nossa luita, assistimos ao convite dos companheiros/as aragoneses/as após umha relaçom que começou já no Dia da Pátria de 2010, ano da constituiçom de Purna.
Na manhá do sábado companheiras de Purna guiárom umha visita por Saragoça antes de dar começo ao jantar popular no Centro Social A Enrestida, situado no centro desta cidade. Após este jantar de confraternizaçom deu-se passo a umhas horas de troca de experiências de luita, de conhecimentos sobre as realidades das três naçons, de opinions e análises sobre a situaçom da crise capitalista atual, língua, história etc...
Nom foi até as 19h que começou a palestra destas jornadas. Após umha breve apresentaçom de Azarug e BRIGA por parte dum companheiro de Purna dérom começo as intervençons. Primeiro a do companheiro canário que fijo um repasso histórico das Canárias. Falou dos primeiros combatentes que reivindicavam o fim do colonialismo e explicou a situaçom atual e campanhas presentes da juventude independentista canária.
A seguir, o companheiro da nossa organizaçom realizou a sua intervençom centrando-se em três eixos: breve repasso histórico para dar a conhecer a realidade de Galiza como naçom, explicaçom de por que consideramos a naçom como um processo histórico dumha óptica marxista, e nom como algo mecánico, umha breve caraterizaçom do independentismo desde a década de 60, mencionando a jovens combatentes como Moncho Reboiras e, finalmente, como, quando e por que nasceu BRIGA, quais som os seus princípios, o seu método de análise, as reivindicaçons juvenis concretas que levou a cabo (direito à rebeliom, liberdade sexual, drogas...), os episódios repressivos, campanhas, etc...
Cabe salientar, se calhar, que o que mais interessou às pessoas presentes da questom galega, abrindo-se um produtivo e crítico debate, foi a questom do feminismo como pilar fundamental dos princípios político-ideológicos do movimento do qual fazemos parte. E também, houvo perguntas e curiosidade pola questom ortográfica do nosso idioma e a demanda de explicaçons da unidade lingüística que defendemos como passo imprescindível para a normalizaçom da nossa língua.
Fôrom apenas umhas horas de convivência mas cheias de intensidade, onde se pudo constatar a necessidade do internacionalismo já desde as organizaçons juvenis como arma indiscutível frente ao mesmo inimigo, ainda que desde realidades distintas.
De BRIGA queremos agradecer o convite da organizaçom juvenil revolucionária aragonesa que nom foi senom um passo mais na solidariedade internacionalista e proletária.
VIVAM ARAGOM E GALIZA LIVRES!
AVANTE A JUVENTUDE INDEPENDENTISTA, SOCIALISTA E FEMINISTA!
O INTERNACIONALISMO SEMPRE PROLETÁRIO!
