Realizado V Congresso Nacional de BRIGA

Fevereiro 2013

BRIGA forjou mais umha vez em Congresso Nacional, e vam cinco, o seu projeto de autoorganizaçom da juventude patriótica, socialista e feminista da Galiza sob a legenda O presente é de luita. O futuro é nosso.

Hoje BRIGA é mais sólida que ontem. Porque apenas passárom uns dias do Congresso Nacional e já sabemos mais de nós própri@s, do que queremos e como o queremos, e de como luitar para consegui-lo. Estamos mais unid@s na conviçom de que a nossa luita nom só é justa, mas também necessária. E de que se nós compreendemos esta necessidade, é porque milhares mais a padecem em potência, disposta a ser prendida e virada em revolta e liberdade. Eis o nosso compromisso.

Renovamo-lo agora num momento óptimo para sentenciar as nossas verdades. Um momento de grave alteraçom social. Por isso é que caem bombas repressivas a eito ao nosso redor, procurando golpear-nos bem adentro e acalar as bandeiras vermelha, nacional e lilás. Será com elas com que marquemos o caminho acertado para sair realmente desta situaçom, deste sistema.

Sábado 2 foi a oportunidade para deixar assentes a nova Tese Política, amparada na votaçom da militáncia e na leitura próxima das frias cifras de cálculo do mal que padecemos, interpretadas com critério dinámico e vontade transformadora. Também se validou a Tese Organizativa, que passará a ser o corpo estatutário durante os próximos dous anos.

As intervençons fôrom constantes. Quase todas as pessoas presentes, militantes, colaboradores/as, simpatizantes... intervinhêrom em número quase pleno. E ainda houvo tempo para que se lessem as saudaçons de organizaçons amigas que nom queriam eludir o seu momento para dar-nos os parabéns: Darréu, Regüelta, Purna, Yesca, Jaleo!, Azarug, e a juventude abertzale.

Também agradecemos AGAL, Associaçom de Amizade Galego-Cubana Francisco Vilhamil, Primeira Linha, NÓS-Unidade Popular e AGIR a sua presença física para transmitir-nos a sua irmandade. Também o figérom, desde a distáncia, a Fundaçom Artábria, o Centro Social Gomes Gaioso, o Centro Social Lume! e o Centro Social O Fuscalho.