BRIGA, organiza�om juvenil da esquerda independentista

Loja Virtual
Arquivo Gr�fico
correio-e:
Compartilhar
Actualizada em
14/01/14
novas

Intervençom política de BRIGA em homenagem a Moncho Reboiras

imagem Agosto 2013

Comunicado lido pola companheira trasanquesa Rosa Casais durante o ato político organizado por NÓS-Unidade Popular na tarde do dia 12 na Rua da Terra em Ferrol.

Companheiras e companheiros, amigas e amigos, boa tarde:

Para umha jovem que como eu, milita na esquerda independentista galega, é umha enorme satisfaçom poder participar na homenagem que a assembleia comarcal de NÓS-UP em Trasancos organiza mais um ano, em memória dum dos nossos principais exemplos e referentes da luita que dia a dia desenvolvemos. Na homenagem a um combatente galego que como nós, militantes de BRIGA, foi, e na nossa imagem ainda é, jovem e rebelde, organizado e disposto a luitar entregadamente por uns objetivos que partilhamos.

A juventude revolucionária galega tem em Moncho Reboiras um exemplo histórico do significado da rebeldia dum povo e dumha classe que resiste contra o submetimento imposto polo inimigo, um exemplo de coerência nos princípios e de açom consequente, de disciplina, responsabilidade e compromisso com a nossa principal tarefa, fazer a revoluçom.

Nuns tempos tam convulsos e instáveis, onde a burguesia nos golpeia sem descanso à par que nos anestesia para nom termos conta das suas agressons, para nom reparar no endurecimento do patriarcado ou na implementaçom dumha descarada ofensiva espanholista, resulta fundamental que as jovens, vítimas da incerteza do desemprego, da violência da emigraçom, do terror da exploraçom, recuperemos a nossa história rebelde e ponhamos em valor referentes válidos que orientem a nossa praxe diária e nos mostrem às claras que, efetivamente, a luita é o único caminho.

Moncho Reboiras nom é para nós, jovens militantes revolucionárias, um sonhador iluso que morreu por acreditar romanticamente que mudaria o mundo. Reboiras é para nós um combatente, um rebelde, um estratega, que nom duvidou em empregar todos os métodos ao seu alcance para luitar contra o nosso inimigo de classe.

Acreditamos na sua lucidez e capacidade, valoramos e fazemos nossas as suas aprendizagens, acolhemos o entusiasmo que nos transmitiu e reconhecemo-lo como um dos nossos principais mestres nesta escola da revoluçom que é a militáncia juvenil.

Moncho Reboiras caiu em combate durante um confronto armado contra a polícia espanhola, um confronto que nom se teria produzido de nom ser porque a coragem e consciência do jovem comunista, representou um verdadeiro perigo para a classe dominante.

Eis aí que está entom a chave para a nossa vitória, aquela que mais teme a burguesia, aquela que pretendem ocultar fazendo-nos acreditar que as e os jovens nom temos capacidade para transformar a realidade. Essa chave que fica oculta por trás da ignoráncia e alienaçom a que somos submetidas através do ensino, da imprensa, dos mass meia, das drogas, das redes sociais… essa perigosa chave imprescindível para somar mais jovens à nossa luita emancipatória: a consciência revolucionária.

É por isso que neste 12 de agosto, justo 38 anos após a sua queda em combate e diante do portal donde era assassinado polo nosso inimigo, BRIGA expressa a vontade de homenagear o Moncho Reboiras, nom só hoje mas todos os dias, e para isso achamos que nom há melhor maneira que continuar a nossa luita sem trégua por espalhar essa consciência da que falamos avançando assim no caminho para umha Galiza independente, socialista e feminista.

Moncho Reboiras deixou-nos um fermoso e valioso legado, deixou-nos a semente mais forte e rebelde, a semente de vencer.