Roteiro juvenil percorre pontos negros da especulaçom e a privatizaçom de Compostela

Abril de 2007

Na passada sexta-feira 20 de Abril decorreu em Compostela o Roteiro anti-especulativo convocado polo Foro da Mocidade, que agrupa a maior parte de entidades juvenis e estudantis da cidade. Tal e como estava previsto o Roteiro começou no centro do Cámpus Sul, no edifício que ocupa o COIE, onde AGIR fijo umha breve exposiçom sobre a paulatina privatizaçom dos serviços prestados pola universidade.

Após a intervençom da organizaçom estudantil, o Roteiro deslocou-se até umha zona residencial de luxo de recente construçom, reclamo eleitoral na campanha local do PSOE, e que exprime à perfeiçom o modelo urbanístico praticado polo governo municipal em Compostela. Dali @s jovens fôrom a Conjo, bairro popular vítima da especulaçom imobiliária e com umha alta taxa de andares vazios, depois ao Ensanche que como poucos mostra que a irracionalidade urbanística nom é cousa nova. No Ensanche o Roteiro fijo umha parada numha imobiliária que foi sabotada de forma simbólica com pintura.

Depois de percorrer o Ensanche compostelano o Roteiro seguiu pola Avda. de Lugo onde com a Cidade de Cultura de fundo BRIGA realizou a sua intervençom dedicada à denúncia da privatizaçom dos espaços públicos. Umha vez terminada a intervençom o Roteiro dirigiu-se até a próxima parada, no lugar que ocupava o Edifício Sindical e que hoje ocupa um edifício de vivendas de luxo a preços astronómicos.

Já na Zona Velha fixo-se umha nova parada na Rua do Franco, um dos pontos negros da exploraçom laboral da mocidade em Compostela, e depois na Praça do Obradoiro, onde @s jovens se encontrárom e increpárom ao Presidente da Cámara Municipal que se achava no balcom da Cámara. Da Praça do Obradoiro o Roteiro continuou até a zona de Santa Clara, onde se realizou umha nova parada e umha intervençom frente ao que foi a primeira casa ocupada da cidade.

O Roteiro anti-especulativo acabou com umha concurrida ceia de convívio no Centro Social da Gentalha do Pichel.