BRIGA denúncia ordenança municipal "anti-botelhom" de Ponte Vedra
Especial Ser jovem nom é delito
Março de 2008
Notícias sensacionalistas na imprensa, opinions de sisudos expertos no tema, consternaçom da cidadania adulta ante o “degenere” juvenil, polícias e representantes do governo espanhol aproveitando para pedir mais policía nas ruas, empresários da hotelaria expondo abertamente que há que controlar o botelhom para que eles se forrem mais… A verdade é que levamos umhas semanas nas que o botelhom é um dos temas estrela da política municipal. A pergunta que nos fazemos é se há para tanto ou se todo isto nom será mais bem um desses problemas inventados para satisfazer alguns interesses, criar alarma social, ou recurtar o uso de espaços públicos…
De BRIGA queremos fazer público o nosso posicionamento em contra da Ordenança municipal aprovada por BNG, PSOE e PP, e que entrará em vigor nas próximas semanas. É de vergonha que uns partidos que se autodefinem de esquerdas (a postura do PP é lógica num partido de extrema direita) sejam os que levem adiante esta Ordenança, que recurta o direito a dispor livremente dos espaços públicos por parte d@s jovens. Em troca, as rançosas e molestas festas e procisons católicas, os actos de exaltaçom militarista, os postos de propaganda de grupos fascistas ou colectivos anti-galegos como “Galicia Bilíngüe” poderám dispor sem problemas das ruas e praças de Ponte Vedra, com o beneprácito do Concelho e protecçom policial.
As elevadas multas que se prevém na Ordenança, de até 3000€, polo simples facto de estar reunid@s fazendo botelhom numha zona nom permitida, som também umha exageraçom, que eleva o nível de repressom contra a juventude na nossa cidade a níveis alarmantes.
Fica claro também que esta Ordenança tem como principais apoios e beneficiários aos empresários da hotelaria, autêntico poder fáctico que está a impor, com a ajuda do Concelho, o seu projecto turistificador. Para as instituiçons e partidos do regime nom é um problema o abafante nível de exploraçom e precariedade que @s trabalhadores/as deste sector, em muitos casos jovens, sofrem. Tampouco é um problema para eles potenciar em Ponte Vedra a turistificaçom que arruína Galiza. O único “problema” que vem é o do botelhom. É falso que se preocupem pola nossa saúde, a conclusom que se tira de todo isto é que a gente pode emborrachar-se até o coma etílico, mas dentro dum local para nom molestar nem escandalizar a ninguém, e para que uns quantos tirem grandes benefícios económicos.
Também denunciamos a hipocrisia arredor do tema do botelhom, negamo-nos a que as nossas formas de lazer e socializaçom tenham que ter o visto e bom de nengumha instituiçom e criticamos a farsa do Concelho convidando com critérios excluintes a organizaçons juvenis sem vida real na cidade e a associaçons juvenis afins ou submissas para dar a sensaçom de que estám a escuitar a voz d@s moç@s de Ponte Vedra.
Nós defendemos outras formas de lazer, além do botelhom, e estamos em contra do consumismo compulsivo que o capitalismo favorece, adopte as formas que adopte, mas nom vamos deixar que se recurtem espaços públicos e se criminalice e reprima à juventude para que os politiquinhos profissionais tentem ganhar umhas eleiçons ou justificar os seus injustificáveis, e elevados, salários.