Cinco filiados da CIG serám julgados o 12 de Março em Vigo polos factos do 1º de Maio de 2005

Março de 2009

Vam lá quatro anos desde aquela manifestaçom de 1º de Maio convocada em Vigo pola CIG, quando a polícia antidistúrbios espanhola irrompeu na Porta do Sol em plena intervençom final, espancando manifestantes, ferindo de gravidade a umha companheira na cabeça e detendo a três filiad@s da CIG, que fôrom postos em liberdade com cárregos ao dia seguinte. Posteriormente, em base ao arquivo policial, engadiam-se ao banco dos acusados dous companheiros mais. Destes cinco repressaliados, três som jovens militantes de BRIGA.

Ante estes factos, a organizaçom quer fazer públicas as seguintes reflexons:

1. O processo judiciário é profundamente irregular e arbitrário. Além de basear-se em identificaçons posteriores empregando fichas policiais, o processo tem-se centrado nas denúncias feitas pola polícia contra os manifestantes; quando há abundante material gráfico que certifica o abuso de força policial sobre a manifestaçom e as diversas agressons. Maliá todo isto, as sucessivas denúncias à polícia feitas pol@s manifestantes fôrom sistematicamente arquivadas. Demonstra-se que nestas ocasions existem regras de medir mui diferentes em funçom de se faz parte dos corpos repressivos, caso no que tés “licença para matar”, ou se és um/umha trabalhador/a, no que só tés licença para aguantar e nom protestar.

2. A verdadeira culpável dos enfrentamentos na rua foi a polícia. Um polícia local foi o que irrompeu no decurso da manifestaçom provocando o primeiro tumulto, e foi também a polícia nacional espanhola a que rebentou o acto de feche da mobilizaçom a pancada limpa. A maioria d@s trabalhadores/as lá presentes nom fixêrom outra cousa que defender-se dumha agressom injustificada. Este processo tenta punir a quem actuou em legítima defesa, e eximir de responsabilidade penal a quem claramente exerceu umha violência brutal e injustificável.

3. As petiçons fiscais som absolutamente desproporcionadas. Para os três jovens, 5.700 euros de multa e 4 anos e 10 meses de prisom polos delitos de atentado à autoridade e resistência; e as faltas de danos e lesons à polícia. Para os outros dous trabalhadores/as, delegados sindicais, pedem mais de 4 anos de prisom e faltas de lesons. Este é o preço a pagar por ter consciência de classe e ser coerente com ela na rua.

4. O 1º de Maio é um dia de luita. Pouc@s jovens d@s que participamos nessa mobilizaçom e normalmente nos 1º de Maio temos dúvidas sobre o que significa esse dia, como outros como o 8 e o 10 de Março, ou o 25 de Julho. Som jornadas de recrudescimento das contradiçons irresolúveis entre Capital e Trabalho, Feminismo e Patriarcado, Galiza e Espanha. Som dias de luita, nom processons inócuas para lançar quatro consignas e voltar ao conformismo e rotina diárias. Som cenários para explicitar o enfrentamento entre os amos do sistema, a burguesia, e as suas vítimas, a classe obreira, os povos, a juventude e as mulheres.

5. A campanha de assédio à juventude deve rematar. Este julgamento inscreve-se numha guerra contínua de amedonhamento à juventude mais consciente. O ciclo repressivo iniciado com as operaçons Cacharrom e Castinheiras mudou de envoltório, mas o seu objectivo continua intacto: Anular a capacidade de combate da juventude obreira, criar medo à repressom e desactivar compromissos.

Mas a crise estrutural capitalista está dando os seus primeiros berros depois de nascer, e o neno deforme começa a dar os seus imparáveis passos. A nós corresponde nom ceder ante a chantagem e a coacçom, mais necessária do que nunca para um sistema que vê como o seu alicerce básico está a fazer tambalear toda a estrutura. De nós depende tumbá-la, com a nossa solidariedade com os repressaliad@s.

BRIGA convoca umha concentraçom de solidariedade diante dos julgados de Vigo, às 9h30 da manhá (perto da praça de América). Lá vos aguardamos.