Fundaçom Artábria chama a mobilizar-se em Ferrol em defesa da língua

Setembro de 2009

Já ninguém é capaz de emascarar a gravidade da situaçom que atravessa a nossa língua. As contínuas campanhas de desprestígio e minorizaçom que sofreu o galego por parte dos governos autonómicos, intensificam-se com a chegada do Partido Popular à Junta da Galiza. O bilingüismo harmónico, coarctada para emascarar a desgaleguizaçom, já nom é util e hoje, com um autonomismo vítima da armadilha normalizadora do espanholismo, o Partido Popular lança-se a umha ofensiva total contra a nossa língua.

Som numerosas as iniciativas que por toda a parte se estám a artelhar para respostar este desafio. Agora é a Fundaçom Artábria a que acaba de fazer pública a convocatória dumha mobilizaçom em defesa da língua que percorrerá as rua de Ferrol a próxima sexta-feira 25 de Setembro. A mobilizaçom, em forma de passa-ruas, partirá da Praça do Hino Galego às 20h00 e irá até a sede do Concelho de Ferrol, passando também pola sede do PP.

A seguir reproduzimos o manifesto feito público pola Fundaçom Artábria, à vez que vos animamos a participar nesta mobilizaçom, assim como no resto de iniciativas em defesa da nossa língua.

Na Fundaçom Artábria vimos fazendo nos últimos tempos umha reflexom, que sem dúvida também vós teredes feito, sobre a gravidade da situaçom a que os poderes públicos estám a levar o nosso idioma.

A chegada do PP ao governo da Junta da Galiza é, sem dúvida, o sinal mais visível e contundente de um processo caracterizado pola falta de implicaçom por parte da maior parte das instituiçons públicas no necessário apoio ao uso do nosso idioma, o galego. É imprescindível afrontar a dramática situaçom que nas últimas décadas vem atravessando, com umha perda de falantes continuada no país que criou e falou o galego durante o último milénio.

Claro que, sendo certo que o Partido Popular é hoje o principal inimigo da nossa língua nas instituiçons públicas, nom é menos certo que o conjunto das instituiçons públicas carecem do necessário interesse para mudar as negativas tendências actuais. No caso de Ferrol, o próprio governo municipal tem enormes carências em matéria de umha tam necessária normalizaçom lingüística.

O alcalde, Vicente Irisarri, primeiro representante institucional do concelho, tem feito do espanhol o veículo expressivo associado ao seu cargo. Independentemente de que idioma falem na sua vida privada, os cargos públicos tenhem que assumir publicamente o uso do galego, tendo em conta que a história de séculos de menosprezo e a actualidade dos poderes económicos e mediáticos deixam a nossa língua numha situaçom de precariedade permanente. Também as actividades formativas, turísticas, laborais, desportivas, etc, que organiza a instituiçom municipal ferrolana estám dominadas polo uso, mui maioritário, do idioma dominante.

Ferrol, como todas as cidades galegas, está a perder falantes de galego de maneira alarmante e isso nom acontece de maneira espontánea nem devido a umha inexistente "livre escolha" dos galegos e das galegas. O processo desgaleguizador responde a um complexo e efectivo esquema de poder que condena a nossa língua à marginalidade, mesmo vestida de falsa protecçom paternalista, e fai do espanhol o único idioma realmente útil e efectivo para a promoçom social e laboral.