Ato central da Galiza Combatente decorreu em Chantada
Outubro 2011A companheira Laura Guisantes falou desde a tribuna que a organizaçom NÓS-UP preparou ao carom do cemitério de Sam Fiz de Asma, paróquia do concelho de Chantada, para fazer as alocuçons políticas na XI ediçom do Dia da Galiza Combatente.
Como nos últimos anos, BRIGA foi convidada a participar com umha intervençom oral. Desta vez, a dumha jovem que se dirigiu às pessoas presentes com um breve discurso que achegaremos proximamente.
Junto com Laura, outras e outros membros da nossa organizaçom estivêrom presentes neste fermoso lugar da Galiza interior, pouco habitual nas atividades da esquerda patriótica. Antes do ato político, um historiador da zona achegou um grupo de pessoas até o lugar em que se cre que foi baleado o combatente antifranquista Piloto, num ponto que agora beira com a barragem de Belesar.
Já à entrada mesma da igreja paroquial, intervinhérom também duas militantes de NÓS-UP, @s poetas Alberte Momám e Verónica Martínez, o historiador Xaquín Yebra e o ex-guerrilheiro de origem asturiana Quico, que formou parte do Exército Guerrilheiro da Galiza e Leom.
O dia foi imelhorável para o objecto da visita: trazer à tona o trabalho insubornável de centenas de homes e mulheres deste país que se entregárom pola emancipaçom, deixando um legado que fai parte da nossa identidade rebelde. Já no interior do camposanto, deitárom-se vários cravos vermelhos sobre o túmulo de José Castro Veiga, e punho em alto cantárom-se os hinos da Internacional e da Pátria.
Agradecemos a NÓS-UP o convite e apelamos a mocidade galega a comprometer-se com o futuro do País guiad@s polo facho do digno passado de figuras como O Piloto.
VIVA A GALIZA COMBATENTE!
Alocuçom de Laura Guisantes
Lugar em que teria recebido os disparos O Piloto
A antiga aldeia, ao descoberto pola seca