Aumenta perseguiçom policial em Compostela sobre os movimentos sociais

Especial STOP repressom!!

Março 2012

O governo local de Compostela continua apertando as porcas dos movimentos sociais. Neste caso é a nossa organizaçom quem se vê afetada por umha multa de 100 euros a três jovens militantes residentes na comarca. O motivo? Colar cartazes na rua.

Desde há uns meses, na capital do país está-se constatando um incremento notável das identificaçons policiais sobre os tradicionais métodos de propaganda utilizados por centenares de coletivos e indivíduos para promover algumha atividade, anunciar um evento ou, digamos por colocar outro exemplo dos inumeráveis existentes, informar da desapariçom dum cam. Como informam os efetivos da polícia local de Compostela, a colagem em "lugares nom habilitados ao efeito" seja qual for o mecanismo de colagem utilizado, é sancionável e, portanto, persegue-se. Obviamente, nom somos ingénuos e sabemos que segundo o conteúdo e as pessoas ou coletivos envolvidos, as multas serám finalmente expedidas ou nom.

Esta perseguiçom em aumento desde a chegada de Conde Roa ao governo local é pois seletiva mas dirigida por defeto a umha imensidade de habitantes de Compostela que nom temos a capacidade económica de promocionar-nos em jornais, valados publicitários oficiais ou grandes concentraçons humanas (estádios, feiras, etc.)

BRIGA quer denunciar publicamente este acosso sistemático que afoga umha das mais elementares vias de expressom popular nas ruas da nossa cidade. Nem nós nem ninguém deve baixar a cabeça e ceder ante esta pressom. Mais umha vez, o poder dirige as suas forças contra a populaçom mais humilde, as camadas populares mais fracas. Os grandes empórios exploradores, as entidades financeiras ladroas ou as próprias administraçons continuam a gozar do direito a empapelar as nossas ruas com as suas mensagens. Nós, nom temos direito.