Passos avante vs repressom no movimento popular galego
Junho 2012BRIGA saúda a inauguraçom do novo Centro Social que funcionará na comarca surenha do Baixo Minho a partir do vindouro dia 15, em concreto desde a localidade da Guarda e com projeçom a toda a comarca.
Sabedoras e sabedores do pulo juvenil que se encontra na raiz da gestaçom deste espaço emancipatório e dinamizador, congratulamo-nos da sua saída à luz e desejamos-lhes os maiores êxitos na árdua tarefa face a consolidaçom como referente para a gente nova da comarca.
Condena ao ataque sofrido polo CS Revolta
O Centro Social viguês mais veterano na maior localidade do país sofreu um ataque incendiário esta passada semana que danou o imóvel de forma evidente segundo os testemunhos gráficos que se proporcionárom para denunciar a sabotagem. BRIGA quer unir-se às múltiplas vozes que se tenhem solidarizado com a comunidade de pessoas que trabalham neste espaço. Denunciamos aliás a açom de induvitável origem fascista que se encontra por trás do ataque, similar aos que todos os anos padece o movimento popular associativo neste país sem que se conheçam perseguiçons policias ou condenas judicias, nem tam sequer supostos implicad@s.
Repressom sobre a Gentalha do Pichel
Um outro Centro Social galego envolvido em problemas, desta volta de caráter administrativo, é o compostelano Gentalha do Pichel, que acabou o percurso de apelaçons sem eludir a sançom por obstaculizaçom da via pública imposta a raiz da colocaçom dumha faixa com a legenda "Na Galiza só em galego". O concelho de Compostela decidiu aplicar intencionalmente a ordenança destinada a sancionar as atividades de entidades concretas, em clara vulneraçom da igualdade perante a lei. Lembremos que a faixa estava colocada numha praça em que decorria um evento da associaçom autorizado previamente.
Perseguiçom reintegracionistas em Ferrol
A Fundaçom Artábria está também recebendo um tratamento distinguido por parte, desta volta, da polícia da câmara municipal, que tem instigado a abertura por parte da subdelegaçom do governo de dous expedientes sancionadores a senlhas pessoas associadas ao coletivo trasanquês, por presunta reuniom ilegal e assédio aos agentes num tranquilo ato que se repete a cada ano no casco velho de Ferrol para homenagear Carvalho Calero. Desde a Fundaçom denunciam que elementos à paisana da polícia espanhola presentes no lugar teriam sido os que solicitaram a intervençom dos fardados do concelho.
... E ameaça de feche em Boiro
O PP governante na localidade boirense apremou com a urgência de quinze dias a resolver mudanças estruturais na natureza da licença urbanística para adaptar o atual local à normativa de ordenaçom, que teria estado violando os últimos anos ao desenvolver atividades que nom se adaptam ao permisso concedido. Do Centro Social apontam diretamente para o clima criminalizador dos últimos meses, e em concreto com os incidentes havidos na celebraçom do 4º aniversário, em que elementos policiais às ordens do governo da vila quigérom "unir-se à festa". Trataria-se pois dumha ofensiva em toda regra marcada no calendário de intervençom política da ultradireita espanhola para a gestom de governo nesta legislatura: acabar com o local social do coletivo Aturuxo.
Todos estes espaços caraterizam-se por terem umha importante participaçom juvenil. Juventude que está no lado certo quando se organiza para construir país, e que está e deve estar frente aos inimigos de Galiza, do galego e da autoorganizaçom popular.
CONTRA A REPRESSOM AO MOVIMENTO POPULAR GALEGO, NEM UM PASSO ATRÁS!