Apresentamos Campanha pola IX Jornada de Rebeliom Juvenil

Este ano a juventude galega é mais pobre do que o anterior. Mais pobre em tamanho, pois milhares de amig@s, companheir@s e familiares tenhem abandonado este país. Mais pobre proporcionalmente, pois a marcha forçada da emigraçom inverte a pirámide poboacional colocando o futuro do país numha terrível expetativa de insustentabilidade. E mais pobre economica, social e laboralmente, pois o desemprego tem aumentado, as reformas laborais de PSOE e PP arramplado com direitos historicamente adquiridos pola classe trabalhadora, e agora ser um/ha explorad@ com jornadas extenuantes e horas nom pagas é mais um privilégio do que um sacrifício.

Ainda, as mulheres galegas continuamos dependendo da sacrosanta unidade nacionalcatólica que pretenda recuperar espaços de poder simbólicos e materiais sobre os nossos corposgraças à reforma da lei do aborto. E também espaços de poder sobre o ensino impondo na nossa pátria o modelo espanholizador de Wert com a LOMCE.

Ao longo de todo o ano estivemos trabalhando sobre estas e outras questons. Nom som poucas. Nem é fácil. Mas ante tanta miséria e entre tantas afrentas, a juventude galega tem hoje precisamente por isso um potencial de revolta muito maior. Nom se explicaria doutro jeito a criminalizaçom e perseguiçom policiais a qualquer dissidência política, ou o permanente controlo do Estado espanhol sobre as áreas de encontro e influência juvenis. Tenhem, apesar de todo, medo.

Desde 2008 a Jornada de Rebeliom Juvenil de BRIGA constava além do festival musical e ato político, dumha manifestaçom. Mantivemo-la com imensas dificuldades ao longo de cinco ediçons. Agora, umha nova que nos provoca profunda ilusiom vai mudar o programa de eventos deste ano: oito entidades juvenis da esquerda nacional galega mobilizaremo-nos conjuntamente pola primeira vez, fazendo a que com certeza será a marcha juvenil independentista mais grande até o de agora. Agir, Adiante, AMI, Briga, Comités, Galiza Nova, Isca! e LEG chamamos conjuntamente a participar dum único ato político nas ruas da capital, como se pode ver na rolda de imprensa realizada na Praça de Praterias a começos desta semana: http://www.youtube.com/watch?v=h8Qq8YAAZy8&feature=youtu.be

Após a marcha, volveremos realizar um concerto ao lado da faculdade de Engenharia Química do Cámpus Sul da USC, onde o ano passado. As pejas colocadas polo mui corrupto governo local de Compostela, primeiro dirigido por Conde Roa e agora por Currás, impedem que utilizemos localizaçons em solo propriedade do concelho como figéramos em ediçons anteriores com grande sucesso de assistência.

Ao longo dos próximos dias iremos-vos apresentando os grupos que intervirám, assim como o manifesto próprio que para a jornada difundiremos.