Tragédia ferroviária pom fim antecipado à IX JRJ

A tragédia humana que esta noite sucedeu no lugar de Angrois, concelho de Compostela, colocou um lutuoso pano de encerramento à IX Jornada de Rebeliom Juvenil, que foi por tal motivo suspendida com antelaçom ao seu final previsto.

Esta madrugada nom houvo festa e reivindicaçom no aparcadoiro da faculdade de Engenharia Química do Cámpus Sul da USC. Após semanas de preparaçom trabalhando neste evento central do nosso curso político, decidir a sua cancelaçom nom é umha decisom alegre.

Porém, a parte mais lúdica da nossa Jornada de reivindicaçom parecia difícil de digerir com a sucessom de novidades que procediam, casualmente, dum trecho mui próximo da via férrea da mesma capital galega.

A decisom da suspensom dos atos nom vai evitar que proximamente emitamos umha valorizaçom mais sossegada dessa parte que sim decorreu com normalidade: a sucedida manifestaçom unitária da esquerda nacionalista e independentista galega da mao de oito entidades juvenis.

Nestas horas de horror polo terrível acidente ferroviário, só queremos finalizar lamentando que Fracasados de Antemano, Atzembla, Os Tres Trebóns e Rebeliom do Inframundo nom pudessem intervir como estava previsto. E talvez por isso, agradecer a sua compreensom e desejar um futuro reencontro.

Agradecimento extensível às entidades castelhana Yesca e basca Ernai que iam participar no ato político noturno ao longo do desenvolvimento dos concertos.