Ministério de Interior pom em marcha um plano de choque para repremer a auto-organizaçom juvenil
Dezembro de 2005
O ministro espanhol de Interior vém de anunciar no dia de ontem a posta em marcha dum plano de choque para impedir o avanço e desenvolvimento das organizaçons juvenís a actividades delictivas.
A implantaçom e desenvolvimento do projecto tem o sinal de saída no mês que vém, com umha primeira fase que se alongará até 2007. As medidas de repressom aprovadas a este efeito dependerám directamente das chefaturas da Guarda Civil e a Polícia Nacional, e se concretizam na criaçom de sistemas de informaçom e seguimento específicos, a implicaçom prioritária da unidade de Menores e Informaçom, maior inversom na espionagem d@s jovens organizad@s, incremento do número dos centros penitenciários juvenís, acrescentamento da presença policial nos espaços de ócio e reuniom da juventude – em especial em férias e fim de semana – e maior financiaçom para a infiltraçom nas organizaçons juvenís.
No projecto afirma-se a vontade de destruír a implantaçom de três colectivos juvenís principalmente: organizaçons "de extrema esquerda", neonazis e as de jovens latino-americanos. Com o intuito de deturpar a realidade, o Ministério espanhol de Interior intenta introduzir na mesma saca às organizaçons filo-fascistas de inspiraçom nazi e aos Latin Kings ou as organizaçons juvenís da esquerda real. Iguala-se a acçom de apologistas do fascismo e a ultra-direita com a auto-organizaçom dum colectivo de estrageir@s maioritário e de grande presença no Estado espanhol como é o latino-americano, sistematicamente submetido ao acosso policial, ao racismo, à xenofobia, à exploraçom laboral e sexual, etc.
É à repressom da auto-organizaçom deste colectivo marginalizado ao que se lhe dá mais publicidade, mas baixo as palavras de ordem de "luita contra a delinqüência juvenil" se agocha umha clara perseguiçom política às organizaçons juvenís da esquerda de todo o estado. Com a escussa demagógica de plantar-lhe cara aos delictos, o governo espanhol do PSOE impom um recurte brutal das liberdades e direitos da juventude, com seguimentos policiais constantes da actividade juvenil que tenha parámetros políticos que nom se considerem "aceptáveis". Eis comprobamos a boa saúde da democracia de Zapatero e o seu governo, e os estreitíssimos limites que a liberdade de expressom tem neste regimem.
Durante os anos de governo do PP na Moncloa a juventude galega tem sofrido um constante deterioro das suas condiçons materiais de existência, com um recurte constante dos direitos da classe trabalhadora em geral e da juventude em concreto. Neste governo do PSOE, de talante e de diálogo, já vam lá duas operaçons da Guardia Civil contra a juventude organizada na esquerda independentista, dum calado desconhecido nesta nova etapa histórica do MLNG. A aprovaçom deste projecto cujo objectivo é unica e exclusivamente a repressom da juventude, constitui umha barreira de aço para a auto-organizaçom juvenil, da que só nos podemos liberar a través da insubmissom frontal a este novo plano policial de supressom de direitos. A experiência destes meses diz-nos que pouco podemos aguardar do governinho cúmplice de Tourinho e de Quintana, que admite e incluso aplaude as montagens para-policiais contra a juventude. Temos de salvar-nos nós mesm@s, a juventude revolucionária e organizada.