Ampla participaçom nas mobilizaçons em defesa do território

Maio de 2007

BRIGA participou nas mobilizaçons em defesa do território e do meio-ambiente convocadas o passado fim de semana em Ponte Vedra e Compostela.

A primeira das mobilizaçons foi a tradicional marcha anual convocada pola Plataforma em Defesa da Ria de Ponte Vedra que percorreu o trajecto entre a Alameda de Ponte Vedra e o complexo de ENCE o Sábado 5 de Maio. BRIGA participou nesta marcha com faixa própria, denunciando a responsabilidade directa da fábrica de celulose de ENCE Elnosa na destruiçom do ecossistema da Ria, e exigir o encerramento da mesma.

Na mobilizaçom, que tivo umha nutrida participaçom e contou com o apoio de numerossos colectivos e organizaçons, lançarom-se palavras de ordem como Ence fora da Galiza! ou Celulose feche já!. @s manifestantes só se atoparom com as forças repressivas no próprio complexo industrial, impedindo o acesso às portas da fábrica.

Já no Domingo 6 de Maio, na mobilizaçom em defesa dum desenvolvimento sustentável e respeituoso com o nosso território, a militáncia de BRIGA participou no cortejo de NÓS-Unidade Popular. A manifestaçom, que partiu da Alameda de Compostela e rematou na compostelana Praça da Quintana, foi o reflexo das numerossas agressons que contra o meio estám em marcha ao longo do país e a importante contestaçom popular que recebem por parte de colectivos ou plataformas de carácter local ou comarcal.

As críticas a passividade, quando nom cumplicidade, do Governo autonómico e a governos municipais foi umha constante nas duas mobilizaçons, ainda que se ouvirom com mais força na manifestaçom do Domingo, se quadra, pola aussência das correas de transmissom do BNG e o PSOE na marcha.