BRIGA ocupa o COF em Compostela em defensa dumha sexualidade digna
Abril de 2005
Mais de umha dúzia de mulheres protestárom no Centro de Orientaçom de Compostela. A ocupaçom em que se despregou umha faixa e se pugérom dezenas de colantes por toda a sala deste centro responde à reincidente atitude que as trabalhadoras do COF venhem mantendo com as jovens que acodem a este serviço.
O trato vejatório e culpabilizador com o que as responsáveis do centro tenhem tratado as moças atendidas provocárom o protesto protagonizado por mulheres militantes de BRIGA, há um mês escasso, sendo esta umha nova reivindicaçom muito mais contundente, que quer trascender o testemunhalismo e ser umha mostra de acçom feminista comprometida com a defesa das jovens que aqui som ofendidas, às que se lhes di que nom é tal problema o ficar grávidas, que quase nom há possibilidades de gravidez, etc; além de tê-las aguardando durante horas e demorar a administraçom da pílula .
Cabe salientar que na cidade de Compostela a maioria das mulheres que acodem a solicitar esta pílula tenhem entre 16-20 anos, havendo muitos casos de jovens de 15 e 14 anos.
Este acto está inserido na campanha por umha sexualidade digna desenvolvida por BRIGA em Compostela nestas últimas semanas. As actividades desenvolvidas querem deixar ao nú a falta de políticas de informaçom sexual por parte do concelho, a gravíssima desinformaçom existente, a carência e precariedade à hora de aceder aos contraceptivos, (desde farmácias que se negam a vendê-los, passando por situaçons de desleixo intolerável como a do CDF), a descarada hipocrisia com o que a misógina Igreja espanhola se permite opinar sobre a sexualidade da juventude galega, e sobre que práticas sexuais estám permitidas e quais nom, com as automáticas aderências da direita do PP.
De BRIGA exigimos repartos gratuitos de métodos contraceptivos, a receita gratuita da pílula do dia depois, informaçom e cursos gratuitos sobre práticas sexuais e contracepçom, e umha atençom especializada, profissional e competente em centros como o COF.
- Sabotagem a umha farmácia compostelana conhecida por negar-se a vender contraceptivos
- Campanha de BRIGA em Compostela por umha sexualidade plena
- Protesto diante do prédio do COF em Compostela
