Nom nos calarám! STOP repressom económica contra a juventude rebelde!

Nada novo resulta afirmar hoje que o Estado espanhol reprime, castiga e silencia todo aquele e aquela que ergue a voz contra o criminoso sistema que padecemos. De facto, já se tem tornado tónica habitual a brutal violência policial nas manifestaçons populares, o cúmplice silenciamento mediático (quando nom descarada tergiversaçom) por parte dos meios de imprensa burgueses, as contínuas modificaçons do Código Penal que facilitam a condena da liberdade de expressom, e umha infinidade de mecanismos dos que Espanha se dota para reprimir e sufocar as crescentes arelas de mudança entre amplos setores da populaçom.

A depauperaçom e miséria material que se estende imparável entre o povo trabalhador atinge na sua máxima virulência umha juventude cada vez mais desiludida com o atual sistema capitalista, que cumpre manter domesticada e submetida para evitar qualquer tentativa de rebeliom que coloque em perigo esta evidente ditadura da burguesia. Assim, o Estado espanhol pretende dar umha liçom a toda essa juventude que, condenada à miséria, tem anseios dumha radical transformaçom social. Umha liçom que pretende demonstrar “o quê acontecerá se te rebelas”, e na qual os e as protagonistas castigadas somos aquelas jovens mais conscientes que, tomando a rua como principal espaço de intervençom, manifestamos a firme vontade de tombar este sistema. Mais razons há, se couber, para castigar e reprimir as jovens que rechaçamos o projeto nacional que Espanha representa, sendo assim que a juventude rebelde galega mais conseqüente configuramos o alvo principal do aparelho repressivo espanhol.

BRIGA, como organizaçom juvenil independentista, socialista e feminista, tem sofrido já desde a sua criaçom a repressom, perseguiçom e intoxicaçom por parte do Estado espanhol através de diversos mecanismos: desde a detençom arbitrária de militantes até a condena por falsas acusaçons, passando por desorbitadas sançons económicas por factos tam inofensivos como colar cartazes.

É precisamente a repressom económica a que representa um dos mecanismos mais doados e utilizados contra a juventude rebelde, numha clara tentativa de sufocar-nos e debilitar a nossa capacidade de auto-organizaçom.

Assim, sançons por tentar derrubar a estátua do fascista Millán Astray, por protestos contra a BRILAT, por realizaçom de murais, por participar na manifestaçom da VII Jornada de Rebeliom Juvenil, por danos durante a jornada de greve de 27 de janeiro de 2011... engrossam umha longa lista de multas que BRIGA deve afrontar no imediato e que somam umha quantia superior aos 12.000€.

É por isto que BRIGA pom em andamento umha campanha de solidariedade para recolher achegas económicas que contribuam para fazer frente a esta importante sançom que Espanha nos impom por exercer a liberdade de expressom, e para castigar a nossa irrenunciável vontade de luitar por umha Galiza independente, socialista e nom patriarcal.

Número de conta solidária: 0049 6795 56 2095036710 (Banco Santander)